Lange ist’s her.
«Leitere aufrichte marsch», «Leitere verlengere» Achtung ufpasse! «Ifauhäägge guet», «Sänku guet» …und so witer. Nachdäm mir die mechanischi Leitere bim Restaurant Falke sicher a d’Fassade gsteut hei gha, isch üse Chefelektriker (oh Gott!) ufegstige u het der Schiinwärfer vor Fassade-Belüchtig grichtet. Scho paar Minute später isch d’Leitere wider fahrbereit retabliert gsi.
Der Wirt het üs de ä Harrasse Bier une feine, früschbachne Fleischchäs uftischet - wo mer natürlech sehr gärn vertromet hei. So in etwa hei vieli vo üsi Mittwuchüebige usgseh.
Später isches de chli professioneller worde. Me het du e nöie Strategie is Läbe grüeft, wo der Name «Feu 2005» treit het. Fraget mi aber nid was das aues beinhautet het. Weis nume no das die luschtige Trüppli vo Hydrantiere, Sträbeleiteretrupp, mech.Leitere und so witer zämegleit worde si u so hets du när nume no 3 Züg gä. Die Mehbessere si witerhin im Zug TLF gsi, z Fuessvolk isch im Zug 2 Gsi u der 3 Zug isch usem Verchehr (die wo der Verchehr regle) bestange. D Jahr si dür z Land zoge u me het mänge gseh cho u gseh ga. I ha die Zyt gnosse u d Kameradschaft het passt.
Eines Tages, vor nonid so mängem Jahr isch de no z’nöischte Ching gebore cho. D’Regio-FüürwehrAarberg. Läck het das Wäue gworfe! Riese Unmuet isch dür die Züg vo de verschidene Gmeinde zoge. «Mit dene Duble vo Seedorf mach ig sicher ke Üebig». «De ersch die Barger-Esle». «Die blöde Aarbärger meine eh sie sig öppis bessers»! und no mängs Angers het me ghört.
Zum Glück si die aute Löle und au die Systemkritiker usträtte oder pensioniert worde und es isch wieder ruehiger worde. Die Zämearbeite mit de verschidene Füürwehre hei afa fruchte und es het jede afa merke das die Üebige intressanter gstautet si worde. D’Erfahrig und z’Erlehrnte isch gloub dä »Spirit» wo üs Hüt bi de Üebige und de Iisätz treit und es sichers Gfüehu vermittlet. Mit angere Wort «d’Kameradschaft isch so geil wie no nie vorhär»! I wünschti mir insgeheim, das die Kritiker u die aute Löle das ou chönnte erläbe.
Nach 34 Jahr Führwehrdienscht u 9 oder 10 verflossne Komandannte (gheie ging drus bim zeue) bi ou ig müed worde. I gloube jetz isches für mi Zyt Adieu z’säge u vo ganzem Härze Öich Aune z’danke für die viele interessannte Momänte, die viele Guete Gspräch u die mega Kameradschaft. I danke Öich für’s Verständnis u wünsche öich witerhin gueti Erfahrige u unfaufreiie Isätz.
Häbet nech Sorg Hardy
@ Zug Aarberg: Nei, i wett nid Tauf-Pfarrer mache!
